अस्ट्रेलियन विद्यार्थी भिसा आवदेन फिर्ता गर्नेहरूको सङ्ख्या तीन गुणाले बढेको छ ।

गत अस्ट्रेलियन आर्थिक वर्षमा १५ हजार ३०० भन्दा बढी अन्तर्राष्ट्रिय विद्यार्थीहरूले अस्ट्रेलियन विद्यार्थी भिसा आवेदन फिर्ता लिएका थिए । फिर्ता लिएका भिसा आवेदनको सङ्ख्या २०१९ मा ४ हजार १५६ बाट २०२३ मा करिब ५ हजार ७०० पुगेको थियो । तर, २०२४ मा यो सङ्ख्या तीव्र रूपमा बढेर १५ हजार ३४८ पुगेको छ, जुन कुल आवेदनको ३.६ प्रतिशत हो ।

विशेष गरी व्यावसायिक शिक्षाका विद्यार्थीहरूले उच्च दरमा भिसा फिर्ता लिएका छन् । विशेषज्ञहरूका अनुसार, लामो भिसा प्रक्रिया, विद्यार्थी भिसाका नयाँ नियम, र भिसा अस्वीकृत हुने डरले विद्यार्थीहरू आवेदन फिर्ता लिन बाध्य भएका हुन् ।

अस्ट्रेलियाका आठ विश्वविद्यालयले उच्च भिसा अस्वीकृति दर भएका विद्यार्थीहरूका भर्ना प्रस्ताव रद्द गरेका थिए ।

सरकारले अङ्ग्रेजी भाषा दक्षता, आर्थिक प्रमाण, र भिसा प्रक्रियालाई कडा बनाएको कारण धेरै विद्यार्थीहरूले अन्य देश रोज्न थालेका छन् ।

फेब्रुअरी २०२४ मा, अस्ट्रेलियाका आठ विश्वविद्यालयले अन्तर्राष्ट्रिय विद्यार्थीहरूका भर्ना प्रस्तावहरू रद्द साथै एजेन्टहरूलाई फिर्ता लिन आग्रह गरेका थिए । आवेदकहरूको भिसा शुल्क समेत फिर्ता गरिएको थियो ।

अस्ट्रेलियन होम अफेयर्स विभागले २०२३ डिसेम्बरमा ल्याएको नयाँ नीतिपछि विश्वविद्यालयहरूलाई तीन वटा जोखिम तहमा वर्गीकरण गरिएको थियो । उच्च जोखिम वर्गमा रहेका संस्थाहरूले कडाइका साथ भिसा आवेदनहरूको प्रमाणहरू जाँच्नुपर्ने भएको छ, जसमा अङ्ग्रेजी भाषा दक्षता र आर्थिक क्षमताका थप प्रमाणहरू आवश्यक पर्छन् ।

यसले विश्वविद्यालयहरूले विशेष गरी भारत, नेपाल, र पाकिस्तानका विद्यार्थीहरूका भर्ना प्रस्तावहरू रद्द गरेका छन्, किनभने यी देशहरूबाट आउने विद्यार्थीहरूको भिसा अस्वीकृति दर पनि उच्च छ ।