अमेरिकी फौजले विना भिसा डुङ्गामार्फत अमेरिका छिर्न खोज्ने २ नेपालीसहित ९ जना आप्रवासीलाई गोली प्रहार गरी नियन्त्रणमा लिएको पाइएको छ ।

उनीहरूलाई गएको फेब्रुअरी २६ मा अमेरिकी भन्सार तथा सीमा सुरक्षा सीबीपीले पक्राउ गरेको हो । उनीहरू क्यालिफोर्नियाको सान डिएगो क्षेत्रबाट प्रवेश गर्न खोज्ने क्रममा नियन्त्रणमा लिइएको हो ।

डुङ्गामा २ नेपालीसहित ४ जना ब्राजिल, २ जना मेक्सिको र एक जना चीनका आप्रवासी सवार रहेको जनाइएको छ । उनीहरूको परिचय भने खुलाइएको छैन । गोली प्रहारबाट नेपालीसहितका आप्रवासी घाइते भए नभएको समेत यकिन छैन ।

हाल उनीहरूलाई सीबीपीको हिरासतमा राखेर थप अनुसन्धान भइरहेको बताइएको छ ।

अमेरिकामा जलमार्ग हुँदै अनुमति बिनाको प्रवेशलाई गम्भीर अपराधका रूपमा लिइन्छ । त्यस्तो अपराधमा न्यूनतम ३ देखि अधिकतम १० वर्षसम्म सजायको व्यवस्था छ ।

अमेरिकी राष्ट्रपति डोनाल्ड ट्रम्पले सत्ता सम्हालेसँगै स्थल मार्ग बाट हुने अवैध प्रवेशमा व्यापक कडाइ गरिएको छ । जसले गर्दा मानव तस्करहरूले आप्रवासीहरूलाई जलमार्ग हुँदै अमेरिका छिराउने नयाँ बाटो प्रयोग गर्न थालेका छन् ।

जसले गर्दा सुरक्षा फौजले जलमार्ग बाट हुने अवैध प्रवेशलाई नियन्त्रणका अपरेसनहरू बढाउँदै लगेका छन् ।