राष्ट्रपति डोनाल्ड ट्रम्पले आप्रवासी विरोधी नीतिको प्रत्यक्ष असर अमेरिकास्थित नेपाली विद्यार्थीमा समेत परेको छ । फलस्वरूप अमेरिकामा रहेका नेपाली विद्यार्थीहरूले गर्दै आएको काम गुमाउन थालेका छन् भने नयाँ काम पनि पाउन छाडेका छन् ।

अमेरिकामा अन्तर्राष्ट्रिय विद्यार्थीले कलेजभित्र मात्र काम गर्न पाउने प्रावधान छ । कलेजभित्र साताको २० घण्टासम्म काम गर्न पाइन्छ । तर त्यस्तो कलेजभित्रको इनडोर काम निकै सीमित सङ्ख्यामा मात्र उपलब्ध हुन्छ । जसले गर्दा अधिकांश विद्यार्थीले कलेजबाहिरै नगदमा काम गर्ने गर्छन् । तर यसरी काम गर्नु र गराउनु अमेरिकामा गैर कानुनी हो ।

उता, अमेरिकाको इमिग्रेसन एन्ड कस्टम्स इन्फोर्समेन्टले अवैध आप्रवासीको खोजी गर्न अहिले देशैभरका व्यावसायिक फर्महरूमा छापा मारिरहेको छ । खोजी क्रममा यसरी गैर कानुनी रूपमा काम गरिरहेको पाउन थालेपछि विद्यार्थी र फर्म सञ्चालक दुवैलाई चेतावनी दिन वा पक्राउ नै गर्न थालिएको छ । यही कारण नेपाली विद्यार्थीहरूले काम गुमाउन थालेका हुन् ।

पछिल्लो तथ्याङ्क अनुसार हाल अमेरिकामा करिब ५० हजार नेपाली विद्यार्थी छन् ।

खास गरी, नेपाली विद्यार्थीहरूको बाहुल्य रहेको टेक्सस, न्यु योर्क, क्यालिफोर्निया, भर्जिनिया, फ्लोरिडा, मेरिल्यान्ड जस्ता क्षेत्रमा बढी समस्या देखिएको छ । नयाँ काम खोज्दा समेत सञ्चालकहरूले जोखिम नलिने भन्दै आफूहरूलाई फर्काइने गरिएको विद्यार्थीहरूले नाम नखुलाउने सर्तमा बताएका छन् ।

नयाँ परिस्थितिका कारण नेपाली विद्यार्थीहरू पढाइ पूरा गर्न पनि नसक्ने अवस्थामा पुगेका छन् ।