साउदी अरबले एक साताको अवधिमा २० हजार बढी आप्रवासी पक्राउ गरेको छ । साउदीको गृह मन्त्रालयका अनुसार अप्रिल १० देखि १६ सम्मको अवधिमा २० हजार ६६८ जना गिरफ्तारीमा परेका हुन् ।

उनीहरूलाई साउदीको आवास, सीमा सुरक्षासँगै श्रम कानुन उलङ्घन गरेको अभियोगमा पक्राउ गरिएको मन्त्रालयले जनाएको छ । जसमध्ये १२ हजार ३७२ जनालाई आवासीय कानुन उलङ्घन गरेको आरोपमा लगाइएको छ । ४ हजार ७५० माथि सीमा सुरक्षा र ३ हजार ५६६ जनामाथि श्रम कानुन पालना नगरेको अभियोग लगाइएको छ ।

यस्तै, अवैध रूपमा साउदीबाट भाग्न खोज्ने १ हजार २६४ र साउदी प्रवेश गर्न खोज्ने ९३ आप्रवासी समेत समातिएका छन् ।

यसरी पक्राउ गरिएका मध्ये १२ हजार २३५ जना आप्रवासीलाई देश निकाला गरिएको छ ।

पछिल्लो समय साउदीले अवैध हैसियतमा रहेका आप्रवासी कामदारमाथिको धरपकड तीव्र पारेको छ । जसले गर्दा हरेक हप्ता हजारौँ आप्रवासी पक्राउ पर्दै आएका छन् ।

यद्यपि, यसरी पक्राउ र देश निकालामा पर्नेहरूमा नेपाली भए नभएको विवरण मन्त्रालयले खुलाएको छैन । साउदीमा करिब २ लाख ५० हजार नेपाली कार्यरत छन् ।