मलेसियामा रहेका नेपाली कामदारमाथि चरम श्रम शोषण भइरहेको भन्दै नेपाली दूतावासले सचेत गराएको छ ।  मलेसियास्थित नेपाली दुतावासले विज्ञप्ती जारी गर्दै नेपाली माथिको शोषणबारे म्यानपार कम्पनी तथा श्रमिक भर्ना भर्ने एजेन्सीको ध्यानाकर्षण गराएको हो ।

दूतावासका अनुसार कतिपय कम्पनीहरूले मलेसिया सरकारको न्यूनतम तलब नदिएको, श्रमिकहरूसँग सम्झौताविपरीत कार्य गराइरहेको गुनासो बढेको छ । साथै, ओभरटाइम भुक्तानी नपाउने, आवश्यक सुविधा नपाउने तथा अवैध माध्यमबाट नेपालबाट मलेसिया पठाउने जस्ता गम्भीर समस्या देखा परेको छ ।

यस्तै सम्झौता पत्रमा भएका सर्तहरु कार्यान्वयन नभएको र नेपालबाट सेक्युरिटी गार्डमा जानेसँग मोटो रकम असुलिएको प्रति पनि दूतावासले सचेत गराएको छ । मलेसियामा नेपाली श्रमिकका लागि खोलिएको कोटाको नाममा अवैध रूपमा भर्ती प्रक्रिया सञ्चालन भइरहेकोप्रति गम्भीर हुन विज्ञप्तीमा भनिएको छ ।

यस्तै समस्यामा परेका वा तोकिएको तलब सुविधा नपाएका श्रमिकलाई गुनासो टिपाउन दुतावासले आग्रह गरेको छ । यसका लागि हटलाइन नम्बर वा इमेलमा सम्पर्क गर्न सकिने व्यवस्था मिलाइएको छ।